Luk 4 | NdeIBE | STEP | UJesu, egcwele uMoya oNgcwele, wabuya evela eJodani waqhutshwa nguMoya wamusa enkangala,

Luke 4

Ukulingwa KukaJesu

1 UJesu, egcwele uMoya oNgcwele, wabuya evela eJodani waqhutshwa nguMoya wamusa enkangala, 2 lapho alingwa khona nguSathane okwezinsuku ezingamatshumi amane. Kadlanga lutho ngalezonsuku, kodwa wacina eselambile ekupheleni kwazo.

3 USathane wathi kuye, “Uma uyiNdodana kaNkulunkulu, tshela ilitshe leli ukuthi libe yisinkwa.”

4 UJesu waphendula wathi, “Kulotshiwe ukuthi: ‘Umuntu kaphili ngesinkwa kuphela.’ ”

5 USathane wamholela endaweni ephakemeyo wamtshengisa masinyane yonke imibuso yomhlaba. 6 Wasesithi kuye, “Ngizakunika amandla phezu kwayo kanye lobukhazikhazi bayo, ngokuba ngikuphiwe lokhu, njalo ngingapha loba ngubani engifuna ukumupha. 7 Yikho ungaze ungikhonze, konke kuzakuba ngokwakho.”

8 UJesu waphendula wathi, “Kulotshiwe ukuthi: ‘Khonza iNkosi uNkulunkulu wakho, ubambelele kuye yedwa.’ ”

9 USathane wamholela eJerusalema wayammisa engqongeni yethempeli. “Uma uyiNdodana kaNkulunkulu,” kusitsho uSathane, “ziphosele phansi usuka lapha. 10 Phela kulotshiwe, kuthiwa: “ ‘Uzathuma izingilosi zakhe kuwe zikulinde ngokunanzelela; 11 zizakuphatha ngezandla zazo, ukuze ungatshayeleli unyawo lwakho elitsheni.’ ”

12 UJesu waphendula wathi, “Kuthi: ‘Ungayilingi iNkosi uNkulunkulu wakho.’ ”

13 Kwathi uSathane esedelile ngokumlinga konke lokhu, wamtshiya, kuze kuzuzakale isikhathi esingcono.

UJesu Uyaliwa ENazaretha

14 UJesu wabuyela eGalile elamandla kaMoya, izindaba ngaye zanda kuwo wonke ummango.

15 Wafundisa emasinagogeni abo, abantu bonke bambabaza.

16 Waya eNazaretha, lapho akhuliselwa khona, kwathi mhla weSabatha waya esinagogeni njengenjayelo yakhe. Wasukuma wabala.

17 Umgoqwancwadi yomphrofethi u-Isaya wedluliselwa kuye. Wawutshombulula wafumana indawo okulotshwe khona kwathiwa:

18 “UMoya weNkosi uphezu kwami, ngokuba ingigcobile ukutshumayela izindaba ezinhle kubayanga. Ingithumile ukumemezela ukukhululwa kwezibotshwa lokusiliswa kweziphofu zibone, ukukhululwa kwabacindezelweyo,

19 ukumemezela umnyaka womusa weNkosi.”

20 Umgoqwancwadi lo wasewugoqa, wawubuyisela esikhonzini, wahlala phansi. Amehlo abo bonke esinagogeni athi njo kuye, 21 waseqalisa ngokuthi kubo, “Lamhla umbhalo usugcwalisekile lizizwela.”

22 Bonke bakhuluma kuhle ngaye bemangaliswa ngamazwi amnandi ayephuma emlonyeni wakhe. Babuza bathi, “Kanti kasiyo yini lo indodana kaJosefa na?”

23 UJesu wathi kubo, “Ngeqiniso lizasitsho kimi lesi isaga esithi: ‘Nyanga, zelaphe! Yenza lapha edolobheni lakini lokho esizwa kuthiwa wakwenza eKhaphenawume.’ ”

24 Waqhubeka wathi, ‘Ngiqinisile ngithi kakulamphrofethi othandekayo edolobheni lakibo. 25 Ngiyaqinisa kini ukuthi babebanengi abafelokazi ko-Israyeli ngesikhathi sika-Elija, lapho umkhathi wavaleka okweminyaka emithathu elengxenye kwaba lendlala enzima elizweni lonke. 26 Kodwa u-Elija kazange athunywe lakoyedwa wabo, ngaphandle komfelokazi eZarefathi emmangweni waseSidoni.

27 Babebanengi ko-Israyeli ababelobulephero ngesikhathi sika-Elisha umphrofethi, kodwa munye kuphela phakathi kwabo owahlanjululwayo – uNamani kuphela owaseSiriya.”

28 Bonke abantu ababesesinagogeni bathi bekuzwa lokhu bathukuthela kakhulu.

29 Basukuma, bamtshovela ngaphandle kwedolobho, bamusa eliweni loqaqa okwakwakhelwe kulo idolobho, beqonde ukumsunduzela phansi edongeni. 30 Kodwa wasuka wahamba wadabula phakathi kwexuku labantu.

UJesu Ukhupha Umoya Omubi

31 Wasesiya eKhaphenawume, idolobho elaliseGalile, kwathi ngeSabatha wafundisa abantu.

32 Bamangaliswa yikufundisa kwakhe ngoba intshumayelo yakhe yayilesisindo.

33 Esinagogeni lapho kwakulendoda eyayiphethwe lidimoni, umoya ongcolileyo. Yaklabalala ngelizwi layo lonke yathi, 34 “Hawu! Ufunani kithi, Jesu waseNazaretha? Ulande ukuza sibhubhisa na? Ngiyakwazi ukuthi ungubani – ungoNgcwele kaNkulunkulu!”

35 “Thula!” watsho ngolaka uJesu. “Phuma kuye!” Idimoni layilahla phansi indoda phambi kwabo bonke laphuma lingayilimazanga indoda.

36 Bonke abantu bamangala kakhulu bakhulumisana bathi, “Yikufundisa bani lokhu? Ulaya imimoya emibi ngegunya langamandla layo iphume!” 37 Zamemetheka izindaba ngaye kuwo wonke ummango walapho.

UJesu Uphilisa Abanengi

38 UJesu wasuka esinagogeni waya emzini kaSimoni. Uninazala kaSimoni wayegula ebanjwe ngumkhuhlane onzima, base becela uJesu ukuthi amsize. 39 Wasekhothamela kuye wakhuza umkhuhlane lowo wahle wamyekela. Wathi lothu masinyane wahle walungisela uJesu ukudla.

40 Kwathi ilanga selitshona, abantu baletha kuJesu bonke ababe lemikhuhlane eyehlukeneyo wabaphilisa ngokubeka izandla phezu kwalowo lalowo ngamunye. 41 Phezu kwalokho, amadimoni aphuma kwabanengi ememeza esithi, “Wena uyiNdodana kaNkulunkulu!” Kodwa wawakhuza kazawavumela ukuthi akhulume ngokuba ayemazi ukuthi unguKhristu.

42 Emadabukakusa uJesu wasuka waya endaweni ethuleyo. Abantu bamdinga bathi sebefike lapho ayekhona bazama ukumcindezela ukuthi angabatshiyi. 43 Kodwa wathi, “Ngimele ngitshumayele izindaba ezinhle lakwamanye amadolobho njalo ngokuba yikho engaku-thunyelwayo.” 44 Waqhubeka etshumayela emasinagogeni aseJudiya.